فرح عز

فرح عز الاسبوع الجاى
عايز اروح
يمكن منكش اصحاب قوى انا وهوه بس لازم اروح
...................................................
عرفت عز اول مرة فى الكلية
معرفة سطحية
مرة تسلم ومرة تنفض
لحد ما جمعتنا قعدة الدماغ
وميزة الحشيش انه بيعرفك على طوب الارض
ارمى كتير
بس فى النص هتلاقى حاجات تستاهل
وعز كنت اعرفه قبل ميجمعنا الحشيش
شاب لذيذ
واثق من نفسه
كان مرتبط فى الكلية من بنت اعرفها
شاب عادى
دبلر سنة
وشد حيله بعد كده
من سكان مدينة نصر
بيته جميل
واسع جدا
بس اول حاجة تشدك انه عايش لوحده
هوه واخوه
اخوه ملتزم عنه
لا شرب ولا سجاير
بيدرس عشان يبقى طيار
البيت كبير قوى عليهم هما الاتنين
ابو عز متوفى
وابوه اللى كنت فاكره ابوه طلع جوز امه
وجوز امه اللى كنت فاكره ابوه بيحشش معاه ومع اصحابه
حاجه غريبة
بس واضح ان محدش منهم عايش معاهم
فى البيت صورة
من اول مرة دخلت البيت ده والصورة دى بتشدنى
راجل ومراته فى صورة ابيض واسود
صور زمان
عارف انت الناس بتوع زمان
اللى كانوا ولاد ناس بجد
مش عارف ليه افتكرت علطول الناس اللى كانت بتحضر حفلات الست
مين دول....؟؟
غالبا ابو عز و والدته
بالرغم انهم يبانوا اكبر من كده
............................................................
انا مقتنع ان كل شاب بيشرب حشيش عنده مشكلة
بالرغم من ان كل واحد منهم بينكر ويقولك انا لا
دايما كنت احاول افهم اللى حواليا بيشربوا ليه؟؟
انا وعارف مشكلتى وخلاص
ياترى هما ليه؟؟
وعز من اللى عرفته عنه اكيد عنده اكتر من سبب يهرب عشان بسجارة المزاج
بس عامة
مهما الظروف ما تتغير
اللى بيشرب زى الرجالة كل يوم كل يوم الشرب بيبقى عادة
ميقدرش يبطلها غير مجبر
.............................................................
مش لاقى حاجة اقولها
"ولا حتى اشربها"
بس اكيد هروح الفرح
دا فرح عز