عارف شبرا الخيمة
عارف رجالة شبرا الخيمة
يبقى اكيد تعرف حسن...وأخوه ابراهيم
***
اتعرفت بحسن الأول...كصيدلى صاحب واحد صاحبى
وعشان الدماغ نفس الدماغ
اتلمنا فى قعدة حشيش
وقعدة ورا قعدة
بينهم يوم فى راس البر
عرفت حسن
وسامح شريك حسن فى الصيدلية
وابراهيم اخو حسن
***
حسن راجل صيدلى
وهو راجل قبل ما يكون صيدلى
من ابناء شبرا الخيمة
وخريجى أرقى جامعات مصر
فاتح صيدلية مع سامح صاحبه
وسامح ده غالبا مش متعلم
بس ابن اكبر تاجر خردة فيكى يا شبرا
ومع المرسيدس 200 السودة
وجسم سامح الضخم...وربع وقية حشيش
تكمل المعلمة
وعشان حسن عنده مشكلة فى التكليف...رخص الصيدلية بأسم صاحبه فى الكلية
اللى هوه صاحبى اللى عرفنى عليه
ومن هنا تيجى القاءات المتعددة..بسبب الصيدلية
من اول معرفتى بالشباب دى..وهما عاجبنى
يمكن عشان لقيت فيهم حاجة ملقتهاش فى اولاد القاهرة الأرقى
ولاد مدينة نصر..ومصر الجديدة ..منها الى الهرم وفيصل
الأصل...والواجب...والتقاليد
اكيد نشأتى فى مجتمع ريفى كان ليها تأثير فى ده
وعشان كدة جت المحبة لجو شبرا الخيمة...وليالى شبرا الخيمة
***
حسن وابراهيم ولاد ناس
يعنى مادياً مقتدرين...حسن كان اول واحد اتجوز بعد الكلية علطول
خد بنت خالته...والعائلة كلها وقفت جنب العروسين الجداد..عشان المركب تمشى
ايه الجمال ده
شوية فتح صيدليته مع سامح
ومع حورات الفلوس...وحساسية الرجالة...وعصبيتهم
قالوا نأجرها خمس سنين
وحصل
مستوى حلو مادياً...مقارنة بشبرا نفسها وبعض ضواحى مصر
حلو بس مش للدرجة اللى تخليهم يقدروا يسيبوا شبرا
وهما متأقلمين مع ده بصورة جميلة
وعشان الأتنين...حسن وابراهيم بيفكروا مع بعض
ودماغهم واحدة...حتى فى تربية ولادهم
اسمع الكلمتين دول على لسان ابراهيم
لما بيتكلم عن ابنه الصغير احمد...عمره سنة ونص
ولما يشوف مذيعة فى التليفزيون...يقول بكل برأة
مُزِِة
ماهو لازم يعرف كل حاجة
عشان يقدر يعيش وسط العالم اللى برة دول...يقصد تحديدا سكان شبرا الخيمة
مانا طالما مش هقدر اطلع برة شبرا...يبقى لازم ابنى يطلع عنده القدرة ان يعيش فى مجتمع اسوء من دلوقتى
وعشان كدة انا وحسن اخويا اتفقنا على حاجة
البنات هيخشوا مدارس لغات برة شبرا...ونصرف عليهم من هنا لبكرة
بس الولاد....لا
هيخشوا مدارس حكومة...عشان ينشفوا
***
طب عشان تبقى فى الصورة
ابراهيم خريج كلية تجارة
اشتغل فى اكتر من وظيفة قبل الجواز بهدف التسلية
ودلوقتى بيشتغل فى الدواء المحروق...كوسيط بين المخازن وبعضها والمندوبين والشركات
فلوس حلوة..عمل حر
بيقرا لشكسبير...ويوسف ادريس وغيرهم
مثقف اكتر من ناس كتير جدا شوفتها
عاشق للنت...والسينما الأمريكية
والحشيش...والبيرة على خفيف
سياسة ...هوه بيقول ملوش فيها..وبالرغم من كدة
كلامه كله عن الفراخ اللى اتدبحت واتخدت من الناس ببلاش بحجة انفلونزا الطيور
ورجعوا نزلوها تانى كفراخ مجمدة
وباعوها لحسابهم
وعشان شبرا الخيمة عالم مختلف...محتاج كتير عشان تفهم الدنيا ماشية هناك ازاى
بلطجية...واتاوات
ممكن
حشيش....ومخدرات
اكيد
لدرجة ان الحكومة عملت...وحدة لمكافحة المخدرات مخصوص هناك
كم هائل من البشر
فى منطقة سكنية محدودة
ومعيشة خانقة
النتيجة...مشاكل...وانحرافات
وابراهيم...انسان...ليه وجهة نظر
هو عايش فى شبرا...وولاده هيعشوا هنا
وشعار شبرا الخالد بيقول
البقاء للأقوى
ابراهيم من وجهة نظره..ان الحكومة بتحكمنا كأننا حيوانات
وشايفة الناس بتاكل الظلط عشان تعيش
طب الناس دى لو ارتاحت فى حياتها..هتعمل ايه..؟؟
***
وعشان ابراهيم..مقتنع ان شبرا الخيمة
هى الوجه الحقيقى لمصر
بيحلل كل حاجة من الواقع اللى حواليه
من ايام مدرسته
هناك..فى امتحان الثانوية العامة..طالب
من طلاب فصله
مسك مشرط وقطع بيه ذراعه..بالعرض
عشان يغش...اما يلبس المراقب..ورئيس اللجان تهمة
وغش
يحكيلك عن السرطان زمان
يقولك..كان الوحد يسمع ان فلان..سمع من فلان ...ان اخوه عايش فى عمارة...مات ابو جاره فيها بالسرطان
دلوقتى
الشارع الواحد فى شبرا...فيه تلاتين حالة سرطان
يحكيلك
عن ايام ما اشتغل كمساعد كيميائى
فى معامل...شركة البان جرين لاند
وازاى كان اللبن البايظ...بيتعمل جبنة زى الورد ادام عينه
وعشان السهرة تحلى
يحكيلك..عن جارهم اليتيم
اللى كان بيسلم على الناس...وهو وشه فى الأرض
الشاب الصغير ده..وهو عنده 18 سنة
شاف واحد صاحبه بيتخانق
دخل يحوش...اتضرب...فضرب
وخنقات شبرا غير خناقتنا احنا
هناك...اللى يموت فى خناقة...يتكتب تحت اسمه فى شهادة الوفاة
مشاجرة
لا تحقيق..ولا كلام من ده...دى مشاجرة فى شبرا
والحكومة ...مبسوطة ان ان الشعب نقص واحد
صاحبنا اللى دخل الخناقة ده مات
يا ريت
جه البوليس..لم الليلة كلها
وصاحبنا لقى نفسه واخد سنة سجن
خرج بعد سنة...عنده تسعة عشر عاما
جسمه نحيل...زى ما هوه
بس بقى بلطجى...تقشعر له الأبدان
خرج...اصتدم ببلطجى عتيد...من اللى اسمه يهز حى كامل فى شبرا
صاحبنا شرحه...فى غمضة عين
ودلوقتى عايش على الأتاوات
طب ايه اللى شافه فى السجن خلاه كده...؟؟
سؤال
***
ابراهيم مرة اشتغل فى عقار لمعالجة الصرع
وعشان هوه مش صيدلى...باع علبة ستين قرص لواحد فى منطقة معينة فى شبرا
الراجل خدها وبعها...لأربعين خمسين شاب من اهل المنطقة
طب العقار ده لما يتضرب...الواحد بيبقى عامل ازاى..؟؟
مش طايق نفسه
وعنده من الجرأة...اللى تخليه يدخل محل فى الشارع...ويطلب من صاحبه يطلع اللى معاه
عدائية...ونرفزة...وووو
المهم المنطقة قامت فيها خناقة للصبح...بين الخمسين شاب دول
ناس اتعورت...وناس اتلمت فى البوكس..وبقيت ليلة
لما سمع ابراهيم الكلام ده
وعرف ان الراجل بعها كمخدر...قرر ميبعلوش حاجة تانى
وعشان كان معاه كمية كبيرة وقتها
بعها بسعر التكلفة...لواحد
الواحد ده كان عايزهم ليه..؟؟
عشان البضاعة دى رايحة السجن
!!!!!!!!!!!!!!!!!
***
ابراهيم وحسن شباب من ولاد البلد دى
واحد صيدلى...والتانى محاسب..شغال حر
بيسعوا لرزقهم لحد بوء الأسد
مش عايزين يسيبوا البلد
ومعندهمش امل ان الحال
يبقى غير الحال
هما عارفين ان المركب رايحة على ايام اسود من دى
عشان كده...بيعدوا ولادهم الرجالة للحياة دى
وفى مجتمع شعاره
البقاء للأقوى
لازم تكون قوى
وإلا....!!؟
12 comments:
انا برغم ان تعليقك عندي في البلوج استفزني شويه الااني سعيده جدا دلوقتي انه جابني للعالم بتاعك ده....تعليقي عند زنزانه يمكن ما كانش واضح فا ياريت تتفضل و تقرا ردي عليك عندي في البلوج و اتمني انها تكون محبه من بعد عداوه
البلوج بتاعك بيعكس روح انسان ثائر ..جواه كتير و بيشوف كتير و الدنيا وريته اكتر...انابقالي اكتر من ساعه عماله اقرا عندك و فعلا ما شبعتش و حسيت ان في كل واحد من البلوجز بتاعتك ان اللي بيكتب واحد مختلف..
كلمه صغيره بس ما تتسرعش في الحكم علي الناس
بسم الله الرحمن الرحيم ( ولو كنت فظاً غليظ القلب لانفضوا من حولك ) صدق الله العظيم
لو انت شايفني غلطانه تنصحني مش تسألني انت مسلمه و تعرفي دين و لا لاء ان مش اكبرمن اني اغلط و لو غلطانه مش هتردد ثانيه اني اعتذر لكن اسلوب النقد يكون بدون تجريح
معلش اني طولت عليك.. ان شاء الله تكون دي بداية صفحه جديده
تحياتي
بيقولوا ولاد البلد الأصليين بينقرضوا
دلوقتى عرفت لية
وبيقولوا أخف دم
دم شبرا
عارف انا علاقتي بشبرا وخصوصا شبرا الخيمة سيئة جدا .. موقف شخصي .. مش انطباع عام منعا لسوء الفهم
بس وانا بقرا الكلام ده واصحابك وحالهم وابنه الصغير والمذيعة المزة
صدقني قررت ارجع احبها تاني
شبرا مش الموقف الشخصي .. برده منعا للفهم الخاطىء:)
ناهينا عن البلد و حالها لانه ليش بجديد
الاغذية الفاسدة
استغلال الدواء
الاهمال
بس بجد المجاهرة بالمعصية و قعدة الحشيش ومش عارف ايه بجد غلط كبير
فى حديث للرسول عليه الصلاة و السلام بيقول فيما معناه ان كل امته مغفور لهم الا المجاهون, وهم اللى ربنا بيستر عليهم فى المعصية و هم يفضحوا روحهم
ربنا الهادى
Regards:
Lojain :)
عرفنا كل حاجة عن اصحابك طيب وانت بقى ؟؟ كل الاحياء اللى زى شبرا متشابهة فى العادات والتقاليد والطباع
جميل اوى البوست ده
بياخدنا لعالم الواقع وبيخلينا نعيش اللحظة
طريقتك فى السرد تخلينا نعيش حالة تقمص نشوف فيها صور الحياة وكاننا فتحنا صندوق الدنيا
انت كنت الصندوق وصوتك كان الكلام
والاثر العميق اللى سبته جوانا مش هيعدى بالساهل
اشكرك على تعليمك لى روح شبرا
حفلة أيامنا الحلوه يوم 27 يوليو الساعه 8:30 فى ساقية الصاوى
اكبر تجمع بلوجرى اوعى يفوتكو
Blogger Radio Station
الواقع صعب وبيجرح بس اجمل من الخيال في انه في الاخر واقع مش من صنعك بس تقدر تعمل فيه برضه حاجة منك .. دايما بنهرب منه ، بس في الاخربنجري عليه زي الطفل اللي بيجري في حضن امه رغم انه لسه واكل علقة سخنه منها
لا بجد بوست جامد جدا
حسستني اني اتنقلت لشبرا الخيمه وشايفه الناس اللي فيها وحاضرة خناقتهم
انا بردو بحب المناطق الشعبيه جدا وبحب ناسها ..بحس فيهم بالطيبه والجدعنه ..
يمكن انا دلوقتي مش في منطقه شعبيه ..بس عشت جزء من حياتي في منطقه تعتبر شعبيه ..كنت بحب اوي الناس الطيبه الجدعه اللي صعب بجد تلاقيهم في اي حته تانيه
بحب رمضان والعيد والشوارع المتعلق فيها زينه ونور والعيال الصغيرة اللي بتلعب في الشارع .. بجد حاجه تحسسك انك عايش
تحياتي علي البوست الرائع
اي دة
انت تنفع روائي جامد
والله حسيت نفسي بشوف فلم
عارف افتكرك فلم كريم عبد العزيز ومنه شلبي
واحد من الناس
عارف افتكرك كمان صديق ليا من الهرم بس شب اخلاق وطيبة اي
مفيش زيها
خاطب بنت مش شبرا
لما قالي اتجننت
شبرا يا.... حرام عليك
اش جاب شبرا ليك
مش بقصد حاجة
بس الواد طيب خالص
عارف بعد فترة سابو بعض
من يومين اتصلت بي قالي رجعتلها
يا لهوي هو الواد حصلو اي
ربنا يستر بقى
بس بجد حسن وابراهيم شكلهم جدعان
عارف لي كفاية مش حيسيبو مصر
مع كل اللهط الي بيعملو والي شايفينو
تحياتي ومتشكرة على الوقت الي قضيتو وانت بتكتب البوست دة
ايه فان فين جديدك بقى من شهور ماكتبتش اي حاجه جديده
اكتر حاجه عجبتنى طريقه تفكيره فى اعداد ولاده من اول تربيتهم طالما هيكونوا جزء من المجتمع ده
افضل كتير ما يخليهم ينشأوا على مثاليات يصطدموا بعدها بواقع مختلف تماما عنه
Post a Comment